Pula, Asul, Dilaw at Puti?

Pula, Asul at Dilaw
Pangunahing Kulay ng bandila ng Pilipinas?
Ang sagot mo ay wagi.

Ito rin ang tatlong pangunahing kulay o “Primary Colors” sa ingles.
Kung pagsasamahin ang tatlong ito, samu't saring kulay ang mabubuo.
Gayon din sa ating mga Pilipino:

Pula para sa pag-ibig sa bansa at sa kapwa
Asul para sa katapatan at kalayaan
Dilaw para sa mga masasayang ngiti at pananaw natin sa buhay

Kapag pinagsama ang mga katangiang Pinoy na ito,
Tiyak na sa buong mundo tayo ay lalago!

At ang puti?
hindi ito tinuturing na isang kulay,
ito'y pantay sa anumang bagay,

Ito ang nagsisimbulo ng Pinakadakila sa lahat.
Ang kadakilaan ng ating Panginoong Lumikha
Kung wala Sya, wala rin saysay ang lahat.

Kaya matuwa ka Pinoy dahil Pinoy ang kulay mo!
Sa katangian mong Pula, Asul, Dilaw at Puti
Na kaloob sa atin ng Dakilang Lumikha,
Maraming bagay ang iyong mamimithi!

Pula, Asul, Dilaw at Puti!

“Bangon na Pilipinas! Masarap ang Almusal!”

“Bangon na Pilipinas! Masarap ang Almusal!”

Minsan ko na nabasa ang katagang ito sa isang libro.
Almusal – masarap ang almusal ng Pinoy.
Mainit na pandesal na isasawsaw sa kape.
Amoy pa lang, kanin at ulam na. Masarap!
Handa nanaman sa pagsugod sa panibagong araw.

Naisip ko – kung ganito ang diwa ng bawat Pilipino
Mainit na PusongPinoy na isasawsaw sa napakayamang lupain ng Pilipinas,
Ang sarap langhapin, ang sarap lasapin, ang sarap lunukin,
Parang handa nanaman sa panibagong pagsulong ng bansa.

Bangon na Pilipinas! Masarap ang Almusal!
Ang pagiging Pilipino natin ay Kaloob ng Diyos.
Bilang Pilipino na sa kahit saan man sa mundo ay patok
O sa magagandang dagat man at matataas na bundok

Bangon na Pilipinas! Masarap ang Almusal!
Ang lahat sa atin ay nakahain na
Ating lasapin ang pagiging Pilipino
Ang tunay na yaman ng Pilipinas